სკოტ მაკკოლი — ჩვეულებრივი თინეიჯერია კალიფორნიის პატარა ქალაქ ბეიკონ-ჰილსიდან. მიუხედავად იმისა, რომ ლაკროსში თამაშობს, ეს მის თავდაჯერებულობას ვერ ზრდის. სკოტი ჩაკეტილი და თანატოლებთან არც ისე მეგობრულია, მისი ერთადერთი მეგობარი კი ადგილობრივი შერიფის შვილი, სტაილზ სტილინსკია. სწორედ სტაილზისგან იგებს სკოტი, რომ ახლომდებარე ტყეში უცნობი მამაკაცის ცხედარი იპოვეს. მეგობრები გადაწყვეტენ, რომ საკუთარი ნერვები გამოცადონ და ღამით ტყეში გაემართებიან, რათა საკუთარი თვალით ნახონ ნაპოვნი ნეშტი. თუმცა, მათ ვერაფერს პოულობენ. 

საიდუმლო მოგზაურობის დროს, ბიჭები შემთხვევით მგლების ხროვას გადაეყრებიან. სტაილზს გაქცევა უმართლებს, მაგრამ სკოტს ერთ-ერთი მტაცებელი თავს ესხმის. მიუხედავად იმისა, რომ მისი ჭრილობა სერიოზული არ აღმოჩნდება და მალე განიკურნება, სკოტი ამ უცნაური შემთხვევის შემდეგ საკუთარ თავში უცნაურ ცვლილებებს ამჩნევს. მას ყველა გრძნობა უძლიერდება, სმენა და მხედველობა უფრო მკვეთრდება, ხოლო თავად უფრო სწრაფი და მოხერხებული ხდება.

სკოტი თავის მეგობარს, სტაილზს, უყვება ცვლილებებზე, და სწორედ ის უხსნის სკოტს, რომ ტყეში მას მგელი კი არა, არამედ მაქცია უკბინა. სტაილზი სთხოვს, რომ მისი საიდუმლო დაიცვას. სკოტი ახალ შესაძლებლობებთან ერთად მოულოდნელად გოგონებს შორის პოპულარობასაც იძენს, თუმცა მისი ყურადღება მხოლოდ ერთს, ახალკლასელ ელისონს მიიპყრობს, რომლის მამაც, ბედის ირონიით, მაქციებზე მონადირეა.